വിരൽ തുമ്പിലെ അറിവിൻ്റെ ലോകത്തേക്ക് സ്വാഗതം കൂട്ടുകാരേ... വിജ്ഞാനത്തിന്റെയും വിനോദത്തിന്റെയും കലവറയാണ് എഴുത്തുകൾ. വായന അവ സ്വായത്തമാക്കാനുള്ള കുറുക്കുവഴിയും. വായനയിലൂടെ അറിവുകളുടെ ഒരു മാന്ത്രിക ലോകത്തേക്ക് കടന്നുചെല്ലാം. വായന തുടങ്ങും മുൻപ് ബ്ലോഗ് പേജിൻ്റെ അവസാനഭാഗത്തേക്ക് പോവുക. നിർദ്ദേശം ഉൾക്കൊണ്ട് വായന തുടങ്ങുക...⬇️
ഒന്നിച്ചാൽ പ്രകാശം പരത്തുന്ന
കരുത്തായി മാറുമ്പോഴും
ഒന്നാകിൽ താപത്താൽ സംഹരിച്ചീടുവാൻ
ഒരുപിടി ഭസ്മവും താപപ്രവേഗത്തിൽ
ഓരോന്നായ് പോയിടും കാലത്തിന്നോളത്തിൽ
അലകളിൽ നന്നായ് ഒഴുകിടും
പ്രകാശം പരത്തുന്ന
സദ്ഭാവനാകാംക്ഷകൾ നിശ്ചയം.
-PMS 🤘🏻
❤️🩶🖤❤️🩶🖤❤️🩶🖤❤️🩶🖤
പുഞ്ചിരി തൂകും
പൂവിൻ അധരത്തിൽ,
അഞ്ചിതമായൊരു
കഞ്ചുകകാന്തി—
ഇതാർ ചമച്ചു?
മോഹസുന്ദര
സ്വപ്നങ്ങളെല്ലാം
പലവർണ്ണത്താൽ
പൊതിഞ്ഞ മിഠായിക്കൂടുകൾ.
പൊതിയഴിച്ചോരൊന്നായി
നുണയുന്നോരാനന്ദം
മധുരമായി സ്മൃതികളിൽ ചേരും;
ആനന്ദാമൃതാനുഭൂതിയാൽ
കാറ്റിലലിയും സംഗീതം പോലെ.
-PMS 🤘🏻
🧡💛💚🩵💙💜🤎🖤❤️🩶🤍🩷
കൊയ്ത്തുകഴിഞ്ഞ പാടത്തൊരുവട്ടം കൂടി,
വിഷുക്കിളി പാടി വിരുന്നൊരുക്കുന്നു.
വിഷുവന്നു കണിയും കൈനീട്ടവുമായ്,
കുറ്റിത്താളുകൾക്കിടയിൽ വിണ്ടുകീറും ത്വക്കുമായി.
വെന്തുരുകും ചൂടിനെ പേറുന്ന മണ്ണും,
പകൽ ബാക്കിവച്ച മഞ്ഞക്കണിക്കൊന്നയും.
വലിച്ചെറിയപ്പെട്ട വിഷുക്കൊന്നകുലപോലെ,
പുതു വർഷം മണ്ണിൽ വീണലിഞ്ഞുചേരുന്നു.
പുതുമണം കാത്തിരിക്കും വിള്ളലുകൾ,
വീണ്ടും ആരോടെന്നറിയാതെ ഇടറുന്നു.
വയലുകൾതൻ നെടുവീർപ്പുകൾ കേൾക്കാം,
കാതോർത്തുകൊൾക വിടരുന്ന നാളെകൾ.
വേറിട്ടു പോകുന്ന മണ്ണും മനുഷ്യനും,
മായാത്ത ബിംബമായ് കണികണ്ട കിനാക്കളും.
-Pms 🤘🏻
കഴിഞ്ഞകാലം
.jpeg)
കഴിഞ്ഞുപോയ കാലത്തിൽ നിരന്തര പ്രയത്നത്തിലൂടെ ഓരോ ഭയവും ഇല്ലാതാക്കുകയും പിന്നീട് അവ നമുക്ക് പുഞ്ചിരിയും സമ്മാനിക്കുന്നു. അതിലുപരി ശക്തിയുടെ, പ്രതീക്ഷയുടെ പ്രകാശവും പരത്തുന്നു. ഇന്ന് എന്നെ ചിന്തിപ്പിക്കുകയും സ്വാധീനിക്കുകയും ചെയ്ത വാക്കുകളാണിവ...
ഇന്നലെകളിൽ നിന്ന് പാഠം ഉൾക്കൊണ്ട് നാളെയുടെ സ്വപ്നങ്ങളിലേക്ക് ഇന്ന് ഒട്ടും പ്രതീക്ഷ കൈവിടാതെ, തെല്ലും സമയം പാഴാക്കാതെ കഠിനാധ്വാനം ചെയ്യാൻ ആഹ്വാനം നൽകിയ ജീവിതവിജയം നേടിയെടുത്ത മഹാന്മാരുടെ ഉപദേശങ്ങളിൽ നിന്നും അല്പം വ്യത്യസ്തവും അഗാധമായ അർത്ഥ തലങ്ങളിലേക്ക് നയിക്കുന്നതുമാണ് ഇന്നത്തെ വാചകം. ഏത് നിമിഷവും സ്വയം പ്രയത്നിച്ചു നേടിയ ചെറുതും വലുതുമായ നിരവധി അവസരങ്ങൾ, അവയിലൂടെ നേടിയെടുത്ത നേട്ടങ്ങളിൽ അഹങ്കരിക്കാനും അഭിമാനിക്കാനും, സ്വയം പ്രചോദനമാകാനുമുള്ള കഴിവ് എഴുത്തുകൾക്കും വായനയ്ക്കും ഉണ്ട്. ഒരുപക്ഷേ, നമുക്ക് പ്രിയപ്പെട്ടവരിൽനിന്നു മാത്രം ലഭിച്ചേക്കാവുന്ന പ്രചോദനങ്ങളെക്കാൾ അക്ഷരങ്ങൾ മാന്ത്രികത സൃഷ്ടിക്കും.
മനുഷ്യമനസ്സുകളിൽ ഓരോ കാലങ്ങൾ കഴിയുമ്പോഴും ഊർജ്ജം പകർന്നു കൊടുക്കുന്ന അളവിലും വ്യാപ്തിയിലും ഏറ്റക്കുറച്ചിലുകൾ സംഭവിക്കുന്നു. മറ്റേതൊരു ഊർജ്ജവും പോലെ തന്നെ ഒരു വ്യക്തിക്ക് പുറപ്പെടുവിക്കാൻ കഴിയുന്ന നല്ല അഭിപ്രായങ്ങൾക്കും ചിന്തകൾക്കും പ്രസരണ നഷ്ടം കാലക്രമേണ വന്നുചേരുന്നു. നികത്താൻ കഴിയാത്ത ബന്ധങ്ങളുടെ അകൽച്ചയ്ക്കും കാരണമാകുന്നു. എഴുതപ്പെട്ട അക്ഷരങ്ങൾക്ക് ഇങ്ങിനെ ഒരു മൂല്യച്യുതി ഇല്ല. ചിന്തിക്കുന്നതിനേക്കാൾ ഏറെ സംസാരിക്കുന്നു, സംസാരിക്കുന്നതിൽ വലിയൊരു ഭാഗം ഊർജ്ജം നഷ്ടമാകുന്നു തുടർന്ന് അതിൽ ചെറിയൊരു അംശം പ്രവർത്തിക്കുന്നു, ചിന്തയില്ലാതെയുള്ള പ്രവർത്തനത്തിലൂടെ ഭാഗ്യപരീക്ഷണത്തിനും വിധിയുടെ വിധേയത്വത്തിനും പാത്രമാകുന്നു. ഒടുവിൽ അനുഭവങ്ങളുടെ വെളിച്ചം കയ്യിലുണ്ടെന്ന ആത്മവിശ്വാസത്തോടെ എന്തും ആകാം എന്ന സ്വപ്നം സാക്ഷാത്കരിക്കാൻ പദ്ധതിയിടുന്നു. അനുഭവങ്ങൾ ഏറ്റവും നല്ല ഗുരു തന്നെയാണ് അതിന് ഒരാൾ ചെലവഴിക്കുന്ന സമയം അത് വിവേകത്തോടെ ചിന്തിക്കേണ്ട വിഷയമാണ്. എളുപ്പത്തിൽ ഒന്നും കരസ്ഥമാക്കാൻ സാധിക്കും എന്ന് പ്രസ്ഥാവിക്കുകയല്ല, മറിച്ച് വിവേക പൂർവ്വം ചിന്തിക്കാൻ തുടങ്ങിയാൽ ഉണ്ടായേക്കാവുന്ന പരിഷ്കാരങ്ങളെപ്പറ്റിയാണ് പറഞ്ഞു വയ്ക്കുന്നത്. സത്യത്തിൽ ഓരോ വിജയത്തിനുപിന്നിലും ഇതുപോലെ ഓരോ കാരണങ്ങൾ, പ്രചോധനങ്ങൾ ഇല്ലേ ? അവയിൽ ഏറിയ പങ്കും ഒരു വ്യക്തിയുടെയോ, ഒരു വാചകത്തിൻ്റെയോ പ്രകാശത്തിലൂടെ പകർന്ന് കിട്ടിയ ഊർജ്ജത്തിലൂടെ സാധ്യമായതല്ലേ ?
✍️✍️✍️✍️✍️✍️✍️✍️✍️✍️✍️✍️✍️✍️✍️✍️✍️✍️
ഇനി നാം എങ്ങോട്ട്?
ഇനി നാം എങ്ങോട്ട് ? 2014 - 15 വർഷം തുഞ്ചത്തെഴുത്തച്ഛൻ കോളേജ് മാഗസിൽ പ്രസിദ്ധീകരണത്തിൽ ഉൾപ്പെടുത്തിയ എൻ്റെ എഴുത്ത്. സിഗ്മണ്ട് ഫ്രോയിഡ് എന്ന മഹനായ മന:ശാസ്ത്രജ്ഞൻ്റെ കണ്ടെത്തലുകളിൽ ആകൃഷ്ടനായ എനിക്ക് ഇതുപോലൊരു മലയാളീകരിച്ച മന:ശാസ്ത്ര വിവരണം മാഗസിനിലൂടെ പങ്കുവയ്ക്കണമെന്ന് തോന്നി...
ഭൂമിയിലെ മനുഷ്യരുടെ ജീവിതം തികച്ചും ക്ഷണികമാണ്.
വർഷങ്ങളുടെ പാരമ്പര്യവും അന്തസ്സും കണക്കുകളും നിരത്തി അവയെ തലമുറകളുടെയും, ജോലി, വിദ്യാഭ്യാസം എന്നിങ്ങനെ അതിർ വരമ്പുകൾ തീർത്ത് ദീർഘിപ്പിക്കുന്നത് മനുഷ്യമനസ്സുകളിലാണ്.
ഇതിനിടയിൽ ആഹാരവും ജലവും പോലെത്തന്നെ അറിവുകൾ അത്യാവശ്യമാണ്. അറിവ് നേടാൻ പ്രകൃതിയുടെ പാഠങ്ങളും, അനുഭവങ്ങളും മാത്രം നിലനിന്നിരുന്ന ജീവിത സാഹചര്യങ്ങളിൽ നിന്ന് ഇന്ന് മനുഷ്യ ജീവിതം വളരെ മുന്നേറിയിരിക്കുന്നു.
ത്വരിതപ്പെടുത്തലുകൾക്ക് ആക്കം കൂട്ടുന്നത് അറിവാണ്. ആദ്യം തുടരെയുള്ള അന്വേഷണങ്ങളിലൂടെയുള്ള കണ്ടെത്തലുകളും, ഇപ്പോൾ ഒരു ക്ലിക്കിൽ വിരൽത്തുമ്പിൽ ലഭ്യമാകുന്ന അറിവുകളും അതിന് ഉദാഹരണമാണ്.
പ്രയത്നമില്ലാതെ കിട്ടുന്ന അറിവ് മിക്കപ്പോഴും സാധാരണക്കാരന് അനാവശ്യവും, വിവേകത്തോടെ ലോകം വീക്ഷിക്കുന്നവർക്ക് അനിവാര്യവുമാവുന്നത് അറിവിൻ്റെ സ്വാംശീകരണവും അതോടൊപ്പം വിസ്ഥാപനവും സാധ്യമാകുബോഴാണ്.
➕➕➕➕➕
ഞാൻ എഴുതുന്നു...✍️
വായന എന്തുകൊണ്ടാണ് ഇത്രമാത്രം മനുഷ്യനെ സ്വാധീനിക്കുന്നത് എന്ന് ചിന്തിച്ചിട്ടുണ്ടോ ?
അക്ഷരക്കൂട്ടം വായനയ്ക്ക് പ്രാധാന്യം നൽകുന്നു.
വിവിധ മേഖലകളിലായി വ്യത്യസ്തതയും, തനിമയും ഉൾകൊള്ളുന്ന നിരവധി എഴുത്തുകൾ ഇവിടെ കാണാം.
മിക്ക എഴുത്തുകളും അറിയാവുന്നതും, നമ്മൾ ചിന്തിച്ചിട്ടുള്ളതുമായ സംഭവങ്ങളെ കുറിച്ച് പറയുന്നു.
വായിക്കാനും എഴുതാനും ചിന്തിക്കാനും സമയം കണ്ടെത്തുന്നവർ മനസ്സുകൊണ്ട് വിശാലമായ ലോകം സൃഷ്ടിക്കുന്നു.
വായനക്കായി എഴുത്തുകൾ കടമെടുത്ത് തുടങ്ങിയ ഒരു ബ്ലോഗ് ആണിത്.
ഓരോ എഴുത്തും വായനയിലൂടെ നൽകിയ അനുഭവം മറ്റുള്ളവരിലേക്ക് പകർന്നുകൊടുക്കുവാൻ, സൂക്ഷിക്കാനുള്ള ഇടം എന്ന ആശയത്തിലൂന്നിയ ചിന്ത വർഷങ്ങൾക്ക് ശേഷം ബ്ലോഗ് ആയി ചിട്ടപ്പെടുത്തി.
2016 ൽ തുടങ്ങി 2021ൽ ആദ്യമായി എഴുത്തുകൾ എല്ലാവർക്കും തുറന്ന് വായിക്കുവാൻ സജ്ജീകരിക്കുന്നത് വരെ വ്യക്തിപരമായ പഠന പിന്തുണ സാമഗ്രികൾ മാത്രമായിരുന്നു ഇവിടുത്തെ സമ്പാദ്യം.
അതിനുശേഷം നിരവധി മേഖലകൾ ഉൾക്കൊള്ളിച്ച് വായനയുടെ വിശാലമായ ലോകത്തേക്ക് ഒരു മാർഗദർശനം നൽകാൻ പര്യാപ്തമായ എഴുത്തുകൾ പലയിടങ്ങളിൽ നിന്നായി ശേഖരിച്ചുകൊണ്ടിരിക്കുന്നു.
തീർത്തും മലയാളം ഭാഷയിൽ പ്രവർത്തിക്കുന്ന ഈ അക്ഷരകൂട്ടത്തിൽ ലളിതവും സുന്ദരവുമായ മലയാളം സൂചനകളും ക്രമീകരണങ്ങളും തന്നെയാണ് ഒരുക്കിയിരിക്കുന്നത്.
അക്ഷരക്കൂട്ടം തുടങ്ങാൻ തീരുമാനിക്കുമ്പോൾ മലയാളത്തിൽ എഴുത്തുകൾ പങ്കുവയ്ക്കുന്ന കൂട്ടായ്മകൾ വിരളമായിരുന്നു.
ബ്ലോഗ് ആയതുകൊണ്ട് ഈ ലോകത്തെക്കുറിച്ച് അറിയാനും അറിയിക്കാനും എഴുത്തുകാരൻ മാത്രമേ എക്കാലവും ഉണ്ടാവൂ എന്നതും, കാലങ്ങൾ കഴിയുമ്പോഴും അതിനു മാറ്റം സംഭവിക്കാൻ ഇടയില്ലെന്നും ഞാൻ വിശ്വസിക്കുന്നു.
അക്ഷരങ്ങൾ അവശ്യമുള്ളവന് അതിൻ്റെ മൂല്യം മനസ്സിലാക്കാൻ ഒരു അലങ്കാരത്തിൻ്റെയും ആവശ്യമില്ല.
പ്രശസ്തിയും പ്രതാപവും ആഗ്രഹിച്ചല്ലല്ലോ യഥാർത്ഥ എഴുത്തുകാർ എഴുതുന്നത്.
➕➕➕➕
