ബോളിനെ ഉയർത്തമോ ?
(വായുവിന് സ്ഥിതി ചെയ്യാൻ സ്ഥലം ആവശ്യമാണ്)
ലക്ഷ്യം -
കൈ തൊടാതെ വെള്ളത്തിന് നടുവിലായി വച്ചിരിക്കുന്ന പാത്രത്തിനകത്തുള്ള ബോൾ ഉയർത്താൻ സാധിക്കുമോ എന്ന് കണ്ടെത്തുന്നതിന്.
സാമഗ്രികൾ -
പരന്ന പാത്രം/ഡിഷ് ഒന്ന്, കുഴൽ രൂപത്തിലുള്ള സുതാര്യമായ പാത്രം (ജഗ്ഗ് രൂപത്തിൽ) ഒന്ന്, ചെറിയ ബോൾ ഒന്ന്, മേസൺ ട്യൂബ് 30 cm, ജലം (നിറം ഉള്ളത്)
ഊഹങ്ങൾ -
1. പാത്രത്തിനകത്തേക്ക് മേസൺ ട്യൂബ് കടത്തിവച്ച് വലിക്കുമ്പോൾ ജലം ട്യൂബിലൂടെ നഷ്ടപ്പെടാൻ സാധ്യതയുണ്ട്.
2. പാത്രം ജലത്തിൽ മുങ്ങിയിരിക്കുന്നതിനാൽ വായു ട്യൂബിലൂടെ വലിച്ചെടുക്കാൻ സാധ്യമല്ല.
3. ട്യൂബിലൂടെ വായു പുറത്തേക്ക് വലിക്കുമ്പോൾ ജലവും ബോളും മുകളിലേക്ക് ഉയരും.
പ്രവർത്തനരീതി -
പരന്ന പാത്രത്തിൽ മുക്കാൽ ഭാഗം കളർ ജലം നിറയ്ക്കുന്നു. തുടർന്ന് ചെറിയ ബോൾ നടുവിൽ വരത്തക്കവിധം കുഴൽ രൂപത്തിലുള്ള സുതാര്യമായ കുപ്പി കമിഴ്ത്തി വയ്ക്കുന്നു. ശേഷം മേസൺ ട്യൂബ് കമിഴ്ത്തിവച്ച കുപ്പിയിലേക്ക് കടത്തുന്നു. ട്യൂബിൻ്റെ അഗ്രം കുപ്പിയുടെ മുകൾ ഭാഗം വരെ ഉയർത്തിയ ശേഷം, ട്യൂബിൻ്റെ പുറത്തുള്ള അഗ്രത്തിലൂടെ വായു വലിച്ചെടുക്കുന്നു.
നിരീക്ഷണം -
പാത്രത്തിനകത്തുള്ള വായു ട്യൂബിലൂടെ പുറത്തേക്ക് വലിക്കുമ്പോൾ കളർ ജലം കുപ്പിക്കകത്ത് ഉയരുകയും അതോടൊപ്പം ബോൾ മേലോട്ട് ഉയർന്ന് വരുന്നു. ട്യൂബിൻ്റെ പുറത്തുള്ള അഗ്രം സാവധാനം തുറന്ന് വിടുമ്പോൾ ജലവും ഉയർന്ന ബോളും താഴേക്ക് വരുന്നതായും കാണാം.
നിഗമനം -
പരീക്ഷണത്തിലൂടെ മൂന്നാമത് രൂപീകരിച്ച ഊഹത്തിലേക്ക് എത്തിച്ചേർന്നു. കുപ്പിക്ക് അകത്തുള്ള വായു പുറത്തേക്ക് പോകുമ്പോൾ ഒഴിഞ്ഞ ഇടം സാവധാനം ജലം നിറയുന്നു. ജലത്തിന് മുകളിലുള്ള ബോൾ മേലോട്ട് ഉയരുന്നു. വായുവിനും ജലത്തിനും സ്ഥിതിചെയ്യാൻ സ്ഥലം ആവശ്യമാണ് എന്ന തത്വത്തെ സാധൂകരിക്കുന്നു.
🔴🟢🔵🟡🔵🟢🔴