കടം വാങ്ങിയ വീട് 🏘️
ഞാൻ ജീവിതത്തിൽ ചെയ്ത ഏറ്റവും വലിയ മണ്ടത്തരത്തിൽ ഒന്ന്, എന്റെ മക്കൾക്ക് കൂടി ജീവിക്കുവാൻ വേണ്ടി ഒരു വീട് ഉണ്ടാക്കിയെന്നതാണ്. ഇന്നാണെങ്കിൽ ഞാൻ അത് തീർച്ചയായും ചെയ്യില്ല. മക്കൾ വലുതാകുന്നത് വരെ, ആവശ്യത്തിന് മുറികളുള്ള ഒരു വാടകവീട്ടിൽ ജീവിച്ചേനേ !
ദയവായി എന്നെ തെറ്റിദ്ധരിക്കരുത്. നിങ്ങൾക്ക് ഒരു വീട് തീർച്ചയായും വേണം. പക്ഷേ അത് നിങ്ങൾ നിർമ്മിക്കേണ്ടത്, മക്കൾ വലുതായി അവരവരുടെ പഠനത്തിനായി വീടുവിട്ട് പോയിക്കഴിയുമ്പോഴാണ്.
അങ്ങനെ അവർ, വീട്ടിലേക്ക് ആഴ്ചയിലോ മാസത്തിലോ ഒരിക്കൽ വരുന്ന ആളുകൾ ആയി കഴിയുമ്പോൾ, ഭാര്യക്കും ഭർത്താവിനും ജീവിച്ചു മരിക്കാനായി ഒരു ചെറിയ നല്ല രണ്ടു മുറികൾ മാത്രമുള്ള വീട് നിർമ്മിക്കണം. എല്ലാ ഫെസിലിറ്റികളും ഉള്ള, നടക്കുമ്പോൾ തെന്നാത്ത, പിടിച്ചെഴുന്നേൽക്കാൻ വാഷ് റൂമിലും, ഭിത്തികളിലും, സ്റ്റീൽ കൈവരികൾ ഉള്ള ഒരു വീട്.
മക്കൾ ഇടയ്ക്ക്, അല്ലെങ്കിൽ കല്യാണം കഴിഞ്ഞു വരുമ്പോൾ അവർ ഒരു മുറി ഉപയോഗിക്കട്ടെ! അപൂർവ്വമായി വന്ന്, അത്യപൂർവ്വമായി മാത്രം രാത്രി വീടുകളിൽ ചിലവഴിക്കുന്ന അതിഥികളും ഇങ്ങനെ തന്നെ ചെയ്യട്ടെ !
ഒരു 50 വർഷം മാത്രം നിലനിൽക്കുന്ന രീതിയിൽ മാത്രം വീട് പണിയുക. നമ്മുടെ കാലം കഴിയുമ്പോൾ അതിടിച്ചു പൊളിച്ച് കളഞ്ഞ് വേറെ വീട് പണിയാനോ വിൽക്കാനോ മക്കൾക്ക് ബുദ്ധിമുട്ട് ഉണ്ടാകരുത്. അവർക്കു മനസ്സിനിണങ്ങിയ വീട്, അന്നത്തെ സ്റ്റൈലിൽ വേണമെങ്കിൽ അവർ നിർമ്മിക്കട്ടെ !
പലരുടെയും ജീവിതത്തിലെ ഏറ്റവും വലിയ സമ്പാദ്യങ്ങൾ പോകുന്നത് അതിഭീകരമായ പലിശയുള്ള ഹോം ലോൺ അടച്ചാണ്. ചെറിയ ചെറിയ യാത്രകൾ ചെയ്യാനും, ജീവിതമാസ്വദിക്കാനും വേണ്ടി ഉപയോഗിക്കാവുന്ന പണം നമ്മൾ അറിയാതെ ഒഴുകിപ്പോകുന്നു...
വീട് ഒരു സ്റ്റാറ്റസ് ഒന്നുമല്ല. നമ്മൾ ഇവിടെ ഉപേക്ഷിച്ചു പോകുന്ന, പിന്നീട് വരുന്ന ആളുകൾ ഇടിച്ചു പൊളിച്ച് കളയുന്ന, 60 വർഷം കഴിഞ്ഞാൽ ആർക്കും വേണ്ടാത്ത, സിമന്റ് കൂന മാത്രമാണ് !
ഇത് ഞാൻ ഒരു 15 വർഷം മുമ്പ് ചിന്തിച്ചിരുന്നെങ്കിൽ, എന്റെ ജീവിതത്തിലെ ഏറ്റവും വലിയ പ്രായോഗിക തീരുമാനം ഞാൻ എടുത്തേനെ !
(കടപ്പാട്)
Denis Arackal ©
ᵗʰᵉ ᵏᵉᵉᵖᵉʳ ᵒᶠ ˢᵐᵃˡˡ ᵗʰⁱⁿᵍˢ