ഭാരം തൂക്കും ബലൂൺ 🎈

 ഭാരം തൂക്കും ബലൂൺ 🎈

(വായുവിന് സ്ഥിതി ചെയ്യാൻ സ്ഥലം ആവശ്യമാണ്)

ലക്ഷ്യം -

വായു നിറച്ച ബലൂൺ ഉപയോഗിച്ച് ഭാരമുള്ള ചില്ലുകുപ്പി ഉയർത്താൻ സാധിക്കുമോ എന്ന് കണ്ടെത്തുന്നതിന്.

സാമഗ്രികൾ - 

കുഴൽ രൂപത്തിലുള്ള സുതാര്യമായ ചില്ലു പാത്രം ഒന്ന്, ബലൂൺ ഒന്ന്, തീപ്പെട്ടി, കടലാസ് കഷ്ണം.

ഊഹം - 

1. വായു നിറച്ച, നേർത്ത പാട പോലുള്ള ബലൂണിന് ഭാരമുള്ള ചില്ലുകുപ്പി ഉയർത്താൻ സാധിക്കില്ല.

2. ചില്ലുകുപ്പിക്ക് ഉൾവശം ശൂന്യമായതിനാൽ ചില്ലുകുപ്പി ഉറപ്പിച്ച് നിർത്താൻ പശയുടെ സഹായം ആവശ്യമാണ്.

പ്രവർത്തനരീതി - 

കുഴൽ രൂപത്തിലുള്ള ചില്ലുപാത്രത്തിലേക്ക് കടലാസ് കഷ്ണം സൂക്ഷ്മതയോടെ തീ കൊളുത്തി അകത്തേക്ക് വയ്ക്കുന്നു. കടലാസ് ശക്തിയായി കത്തിതുടങ്ങുമ്പോൾ വായു നിറച്ച ബലൂൺ ചില്ലു പാത്രത്തിന് മുകളിൽ അമർത്തി പിടിക്കുന്നു.

നിരീക്ഷണം - 

തീ കൊളുത്തിയ കടലാസ് കഷ്ണം ചില്ലു പാത്രത്തിലേക്ക് നിക്ഷേപിക്കുമ്പോൾ തീ അല്പം സാവധാനത്തിലാണ് കത്തുന്നത്. കൂടുതൽ ജ്വലിച്ചു തുടങ്ങുമ്പോൾ ബലൂൺ ചില്ലു പാത്രത്തിന് മുകളിൽ അമർത്തുന്നതിനാൽ തീ അണയുന്നു. അതോടൊപ്പം ബലൂൺ അല്പം താഴേക്ക് ചില്ലുകുപ്പിയിലേക്ക് അമർന്നിറങ്ങുകയും, കുപ്പിയും വായു നിറച്ച ബലൂണും വേർപെടുത്താൻ ആവാത്തവിധം ബലപ്പെട്ടിരിക്കുന്നതായും കാണാം.

നിഗമനം - 

പരീക്ഷണത്തിലൂടെ രൂപീകരിച്ച രണ്ട് ഊഹങ്ങളും ശരിയല്ലെന്ന് കണ്ടെത്തി. വായു നിറച്ച ബലൂണിന് ജ്വലിക്കുന്ന കടലാസ് കഷ്ണത്തിൻ്റെ സഹായത്താൽ ഭാരമേറിയ ചില്ലുപാത്രം ഉയർത്താനായി. ചില്ലുകുപ്പിയിലെ ചൂടുള്ള വായു ജ്വലനം നഷ്ടപ്പെടുമ്പോൾ തണുക്കുകയും, ചുരുങ്ങുകയും ചെയ്യുന്നതിനാലാണ് പുറത്തെ വായു അകത്തേക്ക് വലിക്കാൻ ശ്രമിക്കുന്നതോടൊപ്പം വായു നിറച്ച ബലൂൺ ചില്ലുപാത്രത്തോട് ഒട്ടിച്ചേരുന്നത്.

🎈🎈🎈🎈🎈🎈🎈🎈