1341- ലെ മഹാപ്രളയം 🌊

ആലുവയിൽ വച്ച് പെരിയാർ രണ്ടായി പിരിഞ്ഞ് ഒഴുകാൻ കാരണമായ മഹാപ്രളയം.

1341 വർഷകാലത്ത് ഉണ്ടായ മഹാപ്രളയം കേരളചരിത്രത്തിൽ രേഖപ്പെടുത്തപ്പെട്ടതിൽ വച്ച് ഏറ്റവും വലുതാണ്.

ആലുവയിലേക്ക് ഒഴുകിയെത്തുന്ന പെരിയാർ മണപ്പുറത്തിനു വടക്കുവശത്തുകൂടെ ഒഴുകി മുനമ്പത്ത് വച്ച് കടലിൽ ചേർന്നിരുന്നു.

പുഴയുണ്ടായ കാലം മുതൽ ഉള്ള പെരിയാറിന്റെ ഈ ശാഖയെ മംഗലപ്പുഴ ശാഖ എന്നാണ് വിളിക്കുന്നത്.

പടിഞ്ഞാറോട്ട് ഒഴുകുംതോറും മംഗലപ്പുഴ ശാഖയിൽ ചാലക്കുടിപ്പുഴയും കരുവന്നൂർ പുഴയും വന്നുചേരുന്നുണ്ട്.

മഹാപ്രളയത്തെ തുടർന്ന് അധികമായി ഒഴുകിയെത്തിയ ജലം പെരിയാറിനെ രണ്ടാക്കി.

മണപ്പുറത്തിനു തെക്കുവശത്തു കൂടി ഒഴുകിയ പുതിയ കൈവഴി പിൽക്കാലത്ത് മാർത്താണ്ഡവർമ്മ ശാഖയെന്നറിയപ്പെട്ടു.

ഈ ശാഖ കുറച്ച് മുന്നോട്ടൊഴുകി രണ്ടായി പിരിഞ്ഞ് ഉളിയന്നൂർ ദ്വീപ് സൃഷ്ടിച്ചശേഷം വീണ്ടും ഒന്നായി പിന്നെയും പല കൈവഴികളായി പിരിഞ്ഞു വരാപ്പുഴ വഴി അവസാനം കൊച്ചിക്കായലിൽ ചേരുന്നു.

പെരുന്തച്ചന്റെ ജൻമസ്ഥലം മുകളിൽ പറഞ്ഞ ഉളിയന്നൂർ ദ്വീപ് ആണ്.

പരശുരാമൻ പ്രതിഷ്ഠ നടത്തി എന്നു വിശ്വസിക്കുന്ന 108 മഹാ ശിവക്ഷേത്രങ്ങളിൽ പെടുന്ന അതിപുരാതനമായ ഒരു ശിവക്ഷേത്രം ഈ ദ്വീപിൽ ഉണ്ട്.

വീണ്ടും വിഷയത്തിലേക്ക് വരാം.

പെരിയാർ രണ്ടായതു മാത്രമല്ല ഈ മഹാ പ്രളയത്തിന്റെ ബാക്കിപത്രം.

ഇന്ത്യൻ ഉപഭൂഖണ്ഡത്തിലെ ഏറ്റവും വലിയ തുറമുഖമായിരുന്ന മുസിരിസ് ( കൊടുങ്ങല്ലൂർ ) തകരുകയും അഴിമുഖം നികന്നുപോവുകയും ചെയ്തു.

മാർത്താണ്ഡം ശാഖയിലൂടെ ഒഴുകിവന്ന ലക്ഷക്കണക്കിനു ടൺ മണലും എക്കലും മറ്റ് അവശിഷ്ഠങ്ങളും അടിഞ്ഞ് വൈപ്പിൻ, കടമക്കുടി, പിഴല, മൂലമ്പള്ളി എന്നീ ദ്വീപുകൾ സൃഷ്ടിക്കപ്പെട്ടു.

പുതിയ അഴിമുഖം തുറക്കുകയും കൊച്ചി തുറമുഖം ഉയർന്നുവരികയും ചെയ്തു.

കൊച്ചി രാജവംശത്തിന്റെ ഉയർച്ചയ്ക്ക് കാരണമായ സംഭവം കൂടിയാണ് 1341 ലെ മഹാപ്രളയം.

( കടപ്പാട് )